هي: وين بنروح اليوم؟
هو: مدري.
هي: وشلون ماتدري..زهقانين ودّنا نطلع مكان.
هو: طيب خلاص..حددي المكان اللي تبينه وأنا حاضر..بس أهم شي لايكون زحمه ويكون مكّيف ولايكون بعيد.
هي: يعني نروح لجيراننا أفضل.
هو: والله يستحسن خاصة إن البنزين غالي وإذا تأخرنا لازم نتعشى في مطعم وداااااري لازم تشترين شي من السوق (ماله داعي المخاسير).
هي: أففف, ياخي ماملّيت من بيت الجيران والقيل والقال وماغير كل ياكل في لحم الثاني,طيّب على الأقل خلّينا نروح بيت أبو عبد الحمن,صحيح بعيد لكنهمّ ناس في حالهم,مالهم بأحد غير أنفسهم.
هو: إذا رحنا لأبو عبدالرحمن بزهق,كل كلامه عن العقار والسوق وشلون بيستثمر فلوسه,والمشكله إنه لايشغّل التلفزيون ولايلعب ورق ولاشي أبد,وش أقعد أسوي معه.
هي: طيب خلّينا نروح بيت إختي.
هو: يااااااااااثقل دم زوجها,شايف نفسه على إيش مدري من يوم الله فتحها عليه وصار مقرش محد يقدر يكلمه وياااااالله يرد السلام.
هي: ياربي...إنت موعاجبك أحد,بعني حنّا مافينا عيوب؟..ناظر نفسك لو يتصل أخوك تصرفّه وإنت لانت بمقرش ولايحزنون,ولايوصل نهاية الشهر إلا مامعك غير (200) ريال,ومالك خلق تكلم عيالك,حتى أنا..ياللي أنا زوجتك كل حكيك معاي وش طبختي؟متى جو العيال؟ومتى راحوا؟ عمرك مافكرت تقولي مشتاق لك قومي نطلع أنا وأنتي لحالنا نغّير جو,ودّي أسولف معك,نتناقش في أمور عيالنا,لكن خلّي أحد من ربعك......
هو: بس..بس بس...حشى,أعووووووذ بالله,سحاب وإنفرط,كل هذا فيني؟ّ..كل هذا علشان رجل إختك؟...البايخ الماصخ ال...ال...ال...ال....,كل هذي عيوب فيني ياللي محسوبه عليّ (إمرأه) في البيت,كل شي الشغاله تسوّيه حتى كاسة المويه هي اللي تجيبها لي,3 عيال خلوا وزنك 100 كيلو,المكياج ماينحط إلاّ لصديقاتك واللبس الزين ما يطلع إلاّ للناس في العروس التافهه اللي مثل تفكيرك,ولاّ أنا من المغضوب عليهم,مافكّرتي يوم تتزيني لي ولاقلتي مسكين زوجي يجي من العمل تعبان مهدود,خليني أتجهز أتزين على الأقل يدخل يلقاني أفتح النفس,ولا الكشه ياكافي والجلابيه اللي طبختي فيها تقعد إلى وقت النوم وبعد زين لو تغيّرت,لاكحل لاروج لا..لا...لا..لا...لا...لاوتبيني أجي أقولك قومي نطلع,وين النفس اللي تشتهي تطلع مع زوجه مايطلع زينها إلاّ للناس وأبو العيال الله يخلف عليه,ولو تزوجنا وحده ثانيه,ليه وليه وليه؟!!
هي: أنا كذا؟!! أنا اللي ألحين صارت كل العيوب فيني؟!!! الشرهه مو عليك على اللي صابره عليك,إذا كان بعد هالعمر والعشره ماعاد شكلي يعجبك وش يقعدني عندك؟.
هو: إنتي تهدديني,أبد لاتجي الساعه وحده إلاّ وأنتي في بيت أهلك,وعيالي عندي..
هي: ليه بتستقيل من العمل وبتقعد في البيت تربيهم؟!!
هو: بتزوج طبعاً أجل بعيش على ذكراك؟!!!!!
هي: بعد!!!! إلاّ ألحين بروح وش يقعدني للساعه وحده يا...يا...يا...يا...
هو: أقول قبل لاتروحين إنتي طالق!!!!!!!!!!!!!!!!!!!!!!!!!!!!!!!!!!
وإنتهى الحوار المرير..العقيم اللي للأسف يحصل مو دائماً ولا نادراً,يحصل بمعدل لابأس به وليه؟ عشان الروتين القاتل اللي حتى مانطلع أنفسنا منه ولو بحوار ذكي منمق هدّاف..مثل لاعب الكره يحتاج إلى فن حتى يصيب الهدف كذلك الحوار لابد أن نتفنن فيه لنصل إلى أهدافنا بدون وجع راس ولافلان قال ولافلانه عادت( مالي ومال الناس)...قال الرسول صلى الله عليه وسلم:((عليك بنفسك))...
حنّا بس لو نركز على أنفسنا ونترك الناس في حالها,آآآآآآآآآآآآه ماكان هذي حالنا...و((الحياه حلوه بس نفهمها))...ولا يعني هذا إن ليس هناك من هو جدير بالحوار,لا بالعكس,ولكن نطمح للأفضل, (وبصراحه) ودّي هالظاهره تنتهي تندفن تنعدم...تتمزق...تنحرق...إختاروا الوسيله ولكن في كل الحالات لابد من إعدام هذه الظاهره...ستكون الوسيله العقل اللي جمدناه ونسيناه ماعاد نستخدمه إلاّ لمراقبة الناس, ومن راقب الناس مات: غبااااااااااااءً!!!...


ملاحظه:...
الحوار منقول لكنني رأيت مثيلاً له في الواقع وحدث فعلاً ....لكن؟؟!!

مارأيكم؟!!!



تحياااااااااتي..
دمعة رحيل..:rose:

اختي المتألقه دمعة رحيل

كثير ما يعاد مثل هذا الحوار ويكرر .الخطأيقع على كلا الزوجين فلو اختارت الزوجه كلماتها و اختارت الوقت المناسب وكذلك الزوج لتفاديا مثل هذه المواقف.

كما ان اعتماد مبدء المصارحه بين الزوجين عند اي تغيير يطرا ء على احدهما يكون افضل.
فالنقاش باسلوب هادئ والحوار الهادف بدون ذكر فلان وعلان وما اصبح اليه حال هذا وذاك افضل.

كما ان اهمال الزوجه او الزوج لانفسهم وعدم التزيين للطرف الاخر هذا يسبب الكثير من المشاكل .مثل ما نتزين للصحب والطلعات يجب ان نتزين اولا لشريك العمر فهذا كفيل بان يريح الطرف الاخر ويبلغه برساله بدون كلمات بمدى اهتمامنا به وحبنا له.


هذا ما استطيع ان اشارك به الان ولي رجعه ان شاء الله قريبا .

اتمنى ان ارى ردود الاعضاء .

شاكره لكي حسن اختيارك للمواضيع الهادفه.

تحياتي
رحيل

أشكرك أختي رحيل على مشاركاتك التي لاتقل أهميه عن الموضوع بل كانت زياده واضحه ومهمه لعناصر الموضوع..
حوار متكرر..
تصرف متكرر..
ونهايه مؤلمه...بسبب تهور وعدم قدره على إدارة دفة حوار هاديء وناجح..


تحياتي..
دمعة رحيل..